காஞ்சியில் அமைந்துள்ள தேவாரத் தலங்கள் ஐந்து (கச்சி ஏகம்பம், கச்சி மேற்றளி, ஓணகாந்தன் தளி, கச்சி அனேகதங்காவதம், கச்சிநெறிக் காரைக்க்காடு).
மேற்றளியில் சிவபெருமான் இரு திருச்சன்னிதிகளில் இருவேறு திருநாமங்களில் எழுந்தருளி இருக்கின்றார், ஆதி மூலவர் மேற்றளீஸ்வரர், மற்றொரு திருச்சன்னிதியில் எழுந்தருளியுள்ள 'ஓத உருகீசர்' தற்பொழுது பிரசித்தமாய் போற்றப் பெற்று வருகின்றார். ஞானசம்பந்த மூர்த்தி இத்தலத்திற்கு வருகை புரிந்து பாடுகையில், பாற்கடல் வாசரான ஸ்ரீமகாவிஷ்ணு, முன்னர் சிவமூர்த்தி அருளியிருந்த வண்ணம், தன் திருமேனி முழுவதும் உருகியவராய் ஓத உருகீசரோடு கலந்து சிவ சாரூபம் பெற்றதாக, சிவஞான முனிவர் அருளியுள்ள காஞ்சிப் புராணத்தின் திருமேற்றளிப் படலம் பதிவு செய்கின்றது (எனினும் சீர்காழிச் செல்வரின் இத்தலத்திற்கான திருப்பதிகம் நமக்கின்று கிடைக்கப் பெறவில்லை).
அப்பர் சுவாமிகளும் சுந்தரரும் ஓரோர் திருப்பதிகத்தினை அருளிச் செய்துள்ளனர். ஆலயத்திற்கு நேரெதிரே, திருவீதியின் துவக்கத்தில் திருஞானசம்பந்தர் சிறிய தனிக்கோயிலில் இரு கரங்களும் கூப்பிய திருக்கோலத்தில் எழுந்தருளி இருக்கின்றார்.
